Spread the love

Urubanza rwa Jean Twagiramungu uregwa jenoside rurahagarara amezi hafi abiri kugira ngo bategereze umutangabuhamya wa nyuma urwaje umubyeyi we utabashije kuboneka kuri uyu wa 27 Nyakanga 2022, ubwo bari kurangiza kumva abatangabuhamya.Automatic word wrap

Kuwa Gatatu mu rukiko rw’i Huye hari kumvwa abatangabuhamya batatu ba nyuma, ariko umwe ntiyaboneka.

BBC yakurikiranye iri buranisha ivuga ko “Umutangabuhamya wa Gatatu wagombaga kumvwa ntabwo yabonetse kuko arwaje umubyeyi we kandi ngo ari mu mahanga.”

Impande ziburana zombi zemeranyije ko uyu mutangabuhamya ari ingenzi kandi agomba kumvwa mu rukiko ahibereye. Bemeranyijwe gutegereza kugeza igihe uyu azabonekera.

Abandi batangabuhamya bumviswe barimo Emmanuel Bugegera alias ‘Busimba’ wakatiwe gufungwa imyaka icyenda kubera uruhare muri jenoside.

Yavuze ko yari mu gitero kuri kiliziya ya Cyanika cyarimo abasirikare,abajandarume n’interahamwe, yahakanye ko Twagiramungu yari muri icyo gitero.

Yagize ati: “aho twahagurukiye twari bake umuntu yamenyaga abo bari kumwe-ntawari uhari.”

Bugegera yavuze ko no mu bindi bitero yagiye nk’i Musanze uyu uregwa atari ahari, yemeza ko muri jenoside Twagiramungu atavaga mu rugo iwabo ngo kuko nyina yari umututsikazi.

Jean Twagiramungu woherejwe mu Rwanda n’Ubudage muri 2017 aregwa kuba yari mu itsinda ry’abavuga rikijyana ryagize uruhare mu bwicanyi bwakozwe muri kiliziya ya Cyanika n’ahandi mu cyahoze ari Gikongoro, we arabihakana.

Urukiko rwavuze ko urubanza ruzakomeza tariki 15 Nzeri uyu mwaka, humvwa uwo mutangabuhamya usigaye.

Leave a Reply

Your email address will not be published.