Spread the love

Umuvugizi w’ingabo za Uganda (UPDF) zirwanira ku butaka, Lt Col. Chris Magezi, yamaze impungenge Abanyekongo bavuga ko izi ngabo zizifatanya n’iz’u Rwanda (RDF) mu gikorwa cya ‘Operation Rudahigwa’ cyo kurwanya Interahamwe muri Repubulika ya Demukarasi ya Congo (RDC).

Tariki ya 28 Gicurasi 2022, Umugaba w’ingabo za Uganda zirwanira ku butaka, Lt Gen. Muhoozi Kainerugaba, yatangarije kuri Twitter ko umutwe Interahamwe ziri mu bagize umutwe witwaje intwaro wa FDLR ari ibigwari byasize bikoze jenoside mu Rwanda, bityo bikwiye kuhashywa.

Gen. Kainerugaba yagize ati: “Nyuma yo kurangizanya na ADF, tuzibanda ku Interahamwe mu burasirazuba bwa RDC. Abanyabyaha bishe abavandimwe bacu mu 1994. Igihe cyo kuganira kigiye kurangira vuba.”

Uyu muhungu wa Perezida Museveni yasabye Interahamwe kurambika intwaro, zikishyira mu maboko ya UPDF cyangwa RDF, bitaba ibyo zikazatsindirwa muri operasiyo yahawe izina rya ‘Rudahigwa’.

Ati: “Interahamwe zose zigomba kurambika intwaro, zikishyikiriza byihuse ingabo za UPDF cyangwa RDF ziri hafi. Tugiye gutsinda iyi operasiyo ya vuba. Twafashe umwanzuro wo kuyita ‘Operation Rudahigwa’.”

Ariko yageze aho yisubira, avuga ko UPDF izakemura ikibazo cy’Interahamwe yonyine, itabifashijwemo na RDF. Ati: “Ntabwo nkeneye RDF ko imfasha, njye ubwanjye nzazishwanyaguza.”

Nta mpungenge ku butumwa bwa Lt Gen. Kainerugaba

Lt Col. Magezi mu kiganiro Imvo n’Imvano cyo kuri BBC giherutse kujya hanze tariki ya 9 Nyakanga 2022, yabajijwe kuri ubu butumwa bwa Lt Gen. Kainerugaba ku Nterahamwe, asobanura ko Umugaba w’Ingabo zirwanira ku butaka aharanira amahoro.

Ati: “Uko mbizi neza, Gen. Muhoozi ni we uyoboye Operation Shujaa muri Congo ari kumwe na bagenzi bacu bo muri RDC. Gen. Kainerugaba ari imbere mu kugarura amahoro muri iki gice cya Congo, aho ADF imaze imyaka yica abantu, yangiza byinshi, no gutuma ibihumbi by’abantu bava mu byabo. Murumva ko ahubwo ari we uhagarariye amahoro mu burasirazuba bwa Congo.”

Lt Col. Magezi yakomeje ati: “Icyo asaba gusa ni uko imitwe yitwaje intwaro yose muri Congo, by’umwihariko idafatwa nk’imitwe y’iterabwoba, ibibazo byayo byabonerwa igisubizo biciye mu mishyikirano, hanyuma ikarambika intwaro.”

U Rwanda rwemeza ko operasiyo itazabaho

Mu kiganiro n’abanyamakuru cyabaye tariki ya 31 Gicurasi 2022, Minisitiri w’ububanyi n’amahanga n’ubutwererane, Dr Vincent Biruta, yabajijwe kuri iki kibazo, asubiza ko iyi operasiyo itazabaho.

Minisitiri Biruta ati: “Nta bikorwa bizwi by’ubufatanye bwa RDF na UPDF byo kujya gukora ibikorwa bya gisirikare byo kurwanya FDLR muri DRC. Gusa ndagira ngo mbibutse ko UPDF igifiteyo ingabo zagiyeyo zigiye kurwana na ADF, twebwe nta ngabo dufiteyo. Iyo opareshoni mwise ngo ni Operation Rudahigwa ngira ngo ukwiye kuyibaza uwayivuze, naho twebwe, amakuru mfite uyu munsi ni uko nta gikorwa giteganyijwe duhuriyeho n’ingabo za Uganda zo kujya kugira ibikorwa bya gisirikare bikorerwa muri DRC dufatanyije.”

FDLR hamwe n’indi mitwe yitwaje intwaro yose ikorera muri RDC yasabwe kuzirambika, abarwanyi bayo hamwe n’indi ikomoka mu bihugu by’abaturanyi bakava ku butaka bw’iki gihugu. Abakuru b’ibihugu bigize umuryango w’akarere ka Afurika y’iburasirazuba (EAC) bafashe umwanzuro w’uko hazoherezwa umutwe w’ingabo uhuriweho wo kujya kurwanya imitwe itazubahiriza iri tegeko.

Leave a Reply

Your email address will not be published.