Spread the love

Miss Akaliza Amanda wabaye igisonga cya mbere cya Nyampinga w’u Rwanda wa 2021, yiyemeje kuvuga ukuri nyuma y’amahano n’amanyanga amaze igihe avugwa muri iri rushanwa.

Miss Amanda yiyemeje kuvuga ukuri, nyuma y’uko Urwego rw’Igihugu rw’Ubugenzacyaha (RIB) rutaye muri yombi Ishimwe Dieudonné uzwi nka Prince Kid, akaba umuyobozi wa Kompanyi ya Rwanda Inspiration Backup itegura Miss Rwanda.

Prince Kid ufungiye kuri Sitasiyo ya RIB ya Remera kuva ku wa Mbere Tariki ya 25 Mata, akekwaho ibyaha bifitanye isano n’ihohoterwa rishingiye ku gitsina yakoreye abakobwa bitabiriye iri rushanwa mu bihe bitandukanye.

Uyu mugabo yatawe muri yombi nyuma y’inkuru zari zimaze igihe zihwihwisa ko inyuma y’amarido ya Miss Rwanda habera amahano n’amanyanga atandukanye.

Mu byakunze kugarukwaho harimo ruswa y’ishimishamubiri (y’igitsina) yakwa abakobwa bitabira iri rushanwa kugira ngo begukane amakamba, iy’amafaranga, ikimenyane n’icyenewabo ndetse n’ibindi.

Umunyamakuru Samuel Baker Byansi mu nama (Space) yabereye ku rubuga rwa Twitter yahishuye ko afite amakuru y’uko mu bakobwa bitabira irushanwa rya Miss Rwanda harimo n’abashorwa mu bikorwa byo gucuruza umubiri.

Amakuru avuga ko Prince Kid yatawe muri yombi nyuma yo kuregwa n’abakobwa bane bamushinja kuba yarabatse ruswa y’igitsina.

Mu gihe RIB ikomeje gukora iperereza kuri uyu mugabo, Miss Akaliza Amanda yatangaje ko na we afite ukuri kw’ibibera muri Miss Rwanda agomba gutanga.

Mu butumwa Miss Amanda yanditse kuri Twitter ye, yavuze ko yiteguye gusubiza ibibazo byose abantu bibaza ku bibera muri Miss Rwanda.

Ati: “Ndi hano rwose kugira ngo nifatanye n’abakobwa [baba barahohotewe]. Nzabashyigikira nimwumva ko ari cyo gihe cyo kuvuga. Nzabarengera nimunkenera kandi nzabumva nimuramuka muhisemo kwita kuri ibi bintu ubwanyu.”

Uyu mukobwa yakomeje avuga ko mu gihe kirekire cyane yashatse kugira icyo avuga, gusa ntiyabishobora kubera ko kubikora muri icyo gihe nta bimenyetso byari kwangiza byinshi kuruta kubikemura.

Yunzemo ati: “Gusa kuri ubu biri kubera ko biri ku karubanda sinshobora gukomeza guceceka.”

Miss Amanda yaboneyeho gushishikariza abakobwa baba bafite ibyo bahuye na bo guhaguruka bakabibwira Polisi mu gihe baba babyifuza.

Leave a Reply

Your email address will not be published.