Spread the love

Minisiteri y’umutekano w’imbere mu gihugu mu Bwongereza irimo gutegura indege ya kabiri igomba kujyana abasaba ubuhungiro mu Rwanda, ishobora guhaguruka mbere y’uko urukiko rwemeza ko iyi gahunda yemewe n’amategeko, nk’uko amakuru agera ku kinyamakuru The Guardian avuga.

Biravugwa ko indege ya kabiri ishobora guhaguruka mu byumweru bike nubwo urukiko rukuru ruzasuzuma gahunda ya guverinoma ku ya 19 Nyakanga.

Amakuru aturuka muri minisiteri y’umutekano mu gihugu yavuze ko ntacyo yatangaza ku bikorwa cyangwa ibivugwa.

Mu iburanisha ry’Urukiko rw’Uburenganzira bwa Muntu rw’u Burayi, bigizwemo uruhare n’imiryano nka Detention Action na Care4Calais n’ihuriro ry’abakozi rifite 80% by’abakozi b’urwego rushinzwe kurinda imbibi z’u Bwongereza, urukiko rwitambitse indege ya mbere yagombaga kuzana mu Rwanda abasaba ubuhungiro mu Bwongereza ku itariki ya 14 Kamena.

Mu iburanisha ry’urukiko, umucamanza muri uru rubanza, Justice Swift, yabajije umujyanama mu biro bya minisitiri w’umutekano w’imbere mu gihugu, Mathew Gullick, niba bateganya izindi ndege zerekeza mu Rwanda mu gihe cya vuba.

Gullick yashubije ati: “Ibiro bya minisitiri w’umutekano w’imbere mu gihugu birashaka gutegura izindi ndege muri uyu mwaka. Hashobora kubaho indi ndege iteganijwe hagati y’ubu na Nyakanga. Bizasaba kwemerwa na Guverinoma y’u Rwanda. ”

Umuryango uharanira guhagarika iyirukanwa ry’abimukira washyize ubutumwa ku mbuga nkoranyambaga ku ya 24 Kamena ugira uti: “Twumvise ko ibiro by’umutekano w’imbere mu gihugu byatangiye gufunga abantu benshi kugira ngo babohereze mu Rwanda.”

Nyuma y’uko icyemezo cy’agateganyo cy’urukiko rw’i Burayi kibujije indege guhaguruka ku ya 14 Kamena, minisitiri w’umutekano, Priti Patel, yavuze ko yababajwe n’ikibazo cy’amategeko, anenga icyemezo cya ECHR avuga ko gahunda izakomeza.

Yagize ati: “Ntabwo tuzabuzwa gukora igikwiye no gukora gahunda zacu zo kugenzura imipaka y’igihugu cyacu”. Ati: “Itsinda ryacu rishinzwe amategeko rirasuzuma ibyemezo byose byafashwe kuri iyi ndege kandi gutegura indege itaha biratangira ubu.”

Minisiteri y’umutekano w’imbere mu gihugu mu Bwongereza yemeza ko kugeza ubu nta rukiko ruremeza ko gahunda yo kohereza mu Rwanda abasaba ubuhungiro inyuranyije n’amategeko, kandi harimo n’Urukiko rw’Uburenganzira bwa Muntu rw’u Burayi.

Leave a Reply

Your email address will not be published.