Spread the love

Urubyiruko rwo muri Uganda rutuye mu bice byakiriye impunzi z’Abanyekongo mu Karere ka Kisoro biravugwa ko rukomeje kwegerwa n’abarwanyi bo mu mutwe wa M23 baturuka mu burasirazuba bwa Congo bashaka kurujyana kuwufasha mu ntambara.

Umuyobozi mu karere ka Kisoro, Hajji Shaffiq Sekandi, yahishuye ibi avuga ko ari amakuru y’ubutasi aheruka kubageraho.

Sekandi avuga ko amakuru y’ubutasi aturuka muri Bunagana, Umujyi wa Rukundo, Muramba, Nyarubuye na Busanza, agaragaza ko bamwe mu bantu bikekwa ko ari abo mu mutwe wa M23, batangiye kwegera urubyiruko muri ibyo bice, bizera kubinjiza mu ntambara yo mu burasirazuba bwa Congo bigaragara ko nta cyizere cyo kurangira vuba.

Avuga ko urubyiruko rwinshi, rwiganjemo urudafite kazi, rurimo gutekereza kwimukira mu burasirazuba bwa Congo nyuma yo kwizezwa ibihembo birimo ubukungu busangwa muri iki gice cya Congo nk’uko iyi nkuru dukesha Cimpreports ivuga.

Sekandi avuga ko yagiriye inama abayobozi b’imidugudu yose aho abashaka abarwanyi bashobora uba bihishe, yo gutanga amakuru ku bikorwa byose bikemengwa mu midugudu yabo, ndetse ahamagarira ababyeyi kuba maso bagakurikirana aho abana babo baherereye hose n’imyitwarire yabo.

Ati “Nihagira umugande ufata icyemezo cyo kujya mu ntambara agafatwa n’ingabo bhanganye, azitabwaho ku giti cye aho kwitabwa nk’uwoherejwe guhagararira Uganda mu ntambara, kubw’ibyo muraburiwe,”

Umuyobozi w’Umujyi wa Bunagana, Ismail Ndambajje, nawe yaburiye urubyiruko n’abaturage bose muri rusange abasaba kuba maso no kumenyesha polisi ibikorwa byose biteye amakenga.

Sarah Nyirabashyitsi Mateke, Umunyamabanga wa leta ushinzwe ibibazo by’urubyiruko n’abana ndetse akba umudepite uhagarariye akarere ka Kisoro mu nteko, nawe yamenyeshejwe na bamwe mu baturage ko hari ababyeyi bamwe barimo gutekereza kureka abana babo bakajya mu ntambara hakurya y’umupaka kugirango bazazane amafaranga yo gufasha imiryango yabo yugarijwe n’ubukene.

Iyi nkuru ikaba ivuga ko umutwe wa M23 umaze kwigarurira ibice bitari bicye mu burasirazuba bwa Congo, waba ukunzwe cyane n’urubyiruko rwo muri Uganda, aho bamwe bawufata nk’abatabazi n’inshuti za rubanda.

Leave a Reply

Your email address will not be published.