Spread the love

Guverinoma y’u Rwanda n’iya Repubulika ya Demukarasi ya Congo (RDC) binyuze mu ntumwa zoherejwe mu biganiro muri Angola, zashyigikiye ko ingabo z’umuryango wa Afurika y’iburasirazuba (EAC) zijya kurwanya imitwe yitwaje intwaro ya M23 na FDLR.

Izi ntumwa ku ruhande rw’u Rwanda ziyobowe na Minisitiri w’ububanyi n’amahanga n’ubutwererane, Dr Vincent Biruta, n’urwa RDC ziyobowe na mugenzi we, Christophe Lutundula, zatangiye ibi biganiro bimaze iminsi ibiri tariki ya 20 Nyakanga 2022.

Zoherejweyo kugira ngo zige kandi zisuzume imyanzuro yafashwe n’abakuru b’ibihugu barimo: Perezida Kagame w’u Rwanda, Félix Tshisekedi wa RDC na João Lourenço wa Angola usanzwe ari umuhuza w’ibihugu by’akarere k’ibiyaga bigari.

Imyanzuro yafatiwe muri iyi nama y’abakuru b’ibihugu, ifitanye isano n’umwuka mubi watutumbye mu mubano w’u Rwanda na RDC, ushingiye ku bikorwa bya M23 n’ibya FDLR, imitwe yombi ikorera mu burasirazuba bw’iki gihugu cy’abaturanyi.

Ingingo (i) y’umwanzuro (b) werekeye igisirikare n’umutekano, ivuga izi ntumwa zashyigikiye umwanzuro wafatiwe i Nairobi w’uko ingabo za EAC zoherezwa byihuse muri RDC kugira ngo M23 irambike intwaro kandi ive mu duce yafashe. Zasabye kandi ko umuhuza yinjira muri iki kibazo kugira ngo bikorwe.

Ingingo (ii) y’uyu mwanzuro ivuga ko izi ntumwa zashyigikiye umwanzuro w’i Nairobi w’uko ingabo za EAC zoherezwa byihuse muri RDC kugira ngo “zirandure FDLR-FOCA n’imitwe iyikomokaho” kandi impande zombi zigakorana mu bwizerane zikurikirana iki gikorwa.

Ku birego u Rwanda na RDC bishinjanya, izi ntumwa zasabye Perezida wa Angola gushyiraho umusirikare mukuru uzayobora itsinda ry’iki gihugu rizabikoraho iperereza, rigakorana n’abo muri ibi bihugu bazaba bahawe iyi nshingano.

Iri tsinda rizahabwa ububasha bwo kugera mu Rwanda no muri RDC, rikorera iperereza.

Leave a Reply

Your email address will not be published.