Spread the love

Guverinoma y’u Bwongereza n’ishami ry’Umuryango w’Abibumbye ryita ku mpunzi, UNHCR, bikomeje kutavuga rumwe kuri gahunda yo kohereza abimukira mu Rwanda iteganyijwe mu minsi iri imbere.

Ibiro bishinzwe umutekano w’imbere bifite mu nshingano gahunda yo kohereza aba bimukira binjiye mu Bwongereza mu buryo butemewe n’amategeko, bisobanura ko nta mpungenge iki gikorwa giteye kubera ko u Rwanda rusanzwe ari igihugu cyiza ku bimukira no ku mpunzi.

Umuvugizi w’ibi biro yasobanuriye The Guardian ati: “Ubugenzuzi bwacu ku Rwanda bwagaragaje ko ari igihugu cyiza kandi gitekanye, gifite amateka yo gufasha abasaba ubuhungiro no gukorana n’ishami rya UN ryita ku mpunzi, rivuga ko iki gihugu gitekanye kandi ari icyiza ku mpunzi.”

Ku masezerano y’abimukira n’ubufatanye mu iterambere ry’ubukungu u Bwongereza bwagiranye n’u Rwanda, uyu muvugizi yagize ati: “Mu bigize ubufatanye bwacu, u Bwongereza buri gutanga igishoro cy’ibanze cy’amapawundi miliyoni 120 cyo kuzamura iterambere ry’u Rwanda, mu bijyanye n’imirimo, ubumenyi n’amahirwe, byose bigirira akamaro abimukira n’abaturage.”

Ibi biro kandi byibutsa ko u Rwanda rusanzwe rukorana na UNHCR n’umuryango w’ubumwe bw’Uburayi, EU, ku iyoherezwa ry’abimukira baturuka muri Libya kandi byemeza ko izi nzego zisanzwe zishimira iki gihugu ku buryo cyita ku mpunzi n’abimukira.

UNHCR si ko ibyumva

Iri shami rya UN ryemeza ko u Rwanda rucumbikiye impunzi 130.000 ziganjemo izituruka mu bihugu by’abaturanyi, ariko rigasobanura ko sitati yazo itari ukumara igihe kirekire muri iki gihugu.

Umuvugizi waryo yagize ati: “UNHCR ihangayikishijwe cyane na gahunda y’u Rwanda ijyanye n’abimukira ndetse n’ubushobozi bwarwo mu gutanga igisubizo cy’igihe kirekire ku bariya bagiye koherezwa hashingiwe ku masezerano.”

Uyu Muvugizi yavuze ko gahunda ya ETM (Emergency Transit Mechanism) y’abimukira baturuka muri Libya idakwiye gusanishwa n’iy’u Bwongereza n’u Rwanda, kuko aba bimukira bo batazamara igihe kinini muri iki gihugu.

Ati: “ETM ntabwo irimo gutuzwa cyangwa kumara igihe kirekire mu Rwanda, kandi sitati y’ubuhunzi igenwa na UNHCR. Nta mpamvu yumvikana yo kugereranya ETM na gahunda yateganyijwe ko kohereza ku ngufu mu Rwanda abasaba ubuhungiro bikozwe n’u Bwongereza.”

Aya masezerano y’u Bwongereza n’u Rwanda yashyiriweho umukono i Kigali tariki ya 14 Mata 2022. Indege yari kuzana icyiciro cya mbere cy’abimukira ku ya 14 Kamena, ariko yahagaritswe hashingiwe ku cyemezo cy’urukiko rwo ku mugabane w’u Burayi ubwo yiteguraga guhaguruka.

Guverinoma y’u Bwongereza yababajwe n’icyemezo cy’uru rukiko, yatangaje ko ikomeje gushaka uburyo yakohereza aba bimukira, kuko ngo nta gishobora guhagarika iyi gahunda. U Rwanda na rwo ruvuga ko rwiteguye kubakira, rugashimangira ko rubifitiye ubushobozi.

Leave a Reply

Your email address will not be published.