Spread the love

Igisirikare cy’u Rwanda, RDF, kimaze kwemeza ko umusirikare wa Repubulika ya Demukarasi ya Congo (RDC) wiciwe mu karere ka Rubavu yakomerekeje abapolisi babiri barwo.

Itangazo RDF imaze gusohora risobanura ko uyu musirikare wakoreshaga imbunda ya Ak47 yinjiriye ku mupaka muto (petite barrière) mu masaa mbiri y’igitondo, agera muri metero 25 z’ubutaka bw’u Rwanda.

Isobanura iti: “Yatangiye kurasa ku barinzi b’umutekano b’u Rwanda n’abasivili bambukaga umupaka, akomeretsa abapolisi babiri b’u Rwanda.”

Yakomeje iti: “Umupolisi w’u Rwanda wari mu kazi yamurashe mu kwirwanaho no mu kurinda abasivili bambukaga ndetse n’abakozi bo ku mupaka. Umusirikare wa Congo yarashwe arapfa ubwo yari muri metero 25 ku butaka bw’u Rwanda.”

RDF yasabye urwego rw’umuryango w’akarere k’ibiyaga bigari rushinzwe kugenzura umutekano wo ku mipaka, EJVM, gukora iperereza kuri uyu musirikare.

Yemeza kandi ko Leta y’u Rwanda yasabye iya RDC n’abayobozi b’umupaka gusura aho byabereye, inizeza abaturage umutekano.

Leave a Reply

Your email address will not be published.