Spread the love

Minisitiri w’Intebe w’u Bwongereza, Boris Johnson, yatangaje ko abimukira badafite ibyangombwa babarirwa ibihumbi n’ibihumbi ari bo bashobora koherezwa mu Rwanda kugeza mu myaka iri imbere.

Ni nyuma y’aho guverinoma y’u Bwongereza n’u Rwanda zemeranyije guhererekanya aba bimukira, mu gihe ubusabe bwabo bwo kwemererwa ubuhunzi bugisuzumwa.

Minisitiri Patel mu kiganiro  n’itangazamakuru i Kigali, yagize ati: “Abimukira bakora ingendo zashyira ubuzima bwabo mu kaga kandi zitemewe n’amategeko, nk’izifashisha ubwato buto cyangwa abagendera munsi y’amakamyo, ubusabe bwabo bw’ubuhungiro buzajya busuzumirwa mu Rwanda. Abo ubusabe bwabo buzajya bwemerwa bazajya bafashwa kubaka ubuzima bushya kandi bwiza muri kimwe mu bihugu bitera imbere byihuse, kizwi ku rwego mpuzamahanga mu kwakira abimukira.”

Kuri aya masezerano, Minisitiri Patel yagize ati: “Muri ubu bufatanye, u Bwongereza bwashyize umusanzu w’amapawundi miliyoni 120 mu bikorwa by’iterambere ry’ubukungu bw’u Rwanda. Inkunga izanahashyirwa mu bikorwa byo kwimura abimukira, kubacumbikira no kubakira, bijyanye n’ikiguzi cyishyurwa muri izi serivisi mu Bwongereza.”

Mu kiganiro n’abanyamakuru cyabereye i London , PM Boris yasobanuye byinshi kuri aya masezerano yo kohereza abimukira mu Rwanda aratangira kubahirizwa uyu munsi.

Yagize ati: “Guhera uyu munsi, ubufatanye bushya bwacu mu by’abimukira n’iterambere ry’ubukungu busobanuye ko buri wese winjiye bitemewe n’amategeko mu Bwongereza hamwe n’abahageze bitemewe guhera tariki ya 1 Mutarama, agomba koherezwa mu Rwanda.”

PM Boris yamaze impungenge aba bimukira ko mu gihe bazaba bageze mu Rwanda, “bazarindwa neza, babone serivisi zemewe, bahabwe amahirwe yo kubaka ubuzima bushya muri kiriya gihugu gikomeye, babone inkunga dutanga. Politiki yacu ni ndakumirwa kandi u Rwanda ruzaba rufite ubushobozi bwo kwakira ibinyabihumbi icumi by’abantu mu myaka iri imbere.

Abanyamakuru bamubajije niba kohereza aba bimukira mu Rwanda bitazatuma u Bwongereza bwishyura iki gihugu kizabakira akayabo k’amafaranga nk’uko, asubiza ko n’ubusanzwe iyo bazakiraga byabatwaraga ikiguzi kiremereye.

Yasubije ati: “Abasaba ubuhungiro batwara igihugu amapawundi miliyari 1.5 ku mwaka. Ikiguzi cya hoteli ku munsi kigera ku mapawundi miliyoni 5 ku munsi. Ikiguzi kiziyongera. Ni yo mpamvu ari ngombwa kubakumira, gufunga inzira y’abinjira mu buryo bwa magendu.”

Minisitiri w’ububanyi n’amahanga w’u Rwanda, Dr Vincent Biruta witabiriye iki kiganiro kirimo kubera i Kigali, yatangaje ko iki gihugu gisanzwe gicumbikiye abimukira 130,000 baturutse mu bihugu bitandukanye

Leave a Reply

Your email address will not be published.