Spread the love

Perezida Yoweri Kaguta Museveni wa Uganda, yatangaje ko Rt. Hon. Jacob L’Okori Oulanyah wari Perezida w’Inteko Ishinga Amategeko ya kiriya gihugu yapfuye, nyuma y’igihe kirekire arwaye.

Perezida Museveni yemeje aya makuru mu itangazo yanyujije kuri Twitter ye.

Yabwiye abaturage ba Uganda ati: “Ntangarizanyije umubabaro mwinshi urupfu rwa Rt. Hon. Jacob Oulanyah, Perezida w’Inteko Ishinga Amategeko.”

Rt. Hon. Jacob Oulanyah, yari amaze iminsi arwariye muri Leta Zunze Ubumwe za Amerika.

Mbere y’aho yari yararwariye mu gihugu cya Kenya, agaruka muri Uganda gusa uburwayi bukomeza kumuganza.

Perezida Museveni yavuze ko yamenye inkuru y’urupfu rwe mu ma saa yine n’igice zo kuri iki cyumweru ayabwiwe n’abantu bari kumwe na we ndetse n’umuganga wamukurikiraniraga aho yari arembeye.

Yunzemo ati: “Yari umukada mwiza. Natinze gutangaza inkuru y’urupfu rwe kugira ngo abana be babanze bayimenyeshwa. Aruhukire mu mahoro.”

Jacob Oulanyah yari Perezida w’Inteko ya Uganda kuva muri Gicurasi umwaka ushize, nyuma yo gutsinda mu matora Rebecca Kadaga wari umaze imyaka 10 ayikuriye.

Cyakora cyo uyu mugabo ntiyari yarakunze kugaragara mu mirimo y’Inteko kubera uburwayi.

Leave a Reply

Your email address will not be published.