Spread the love

Perezida Félix Antoine Tshisekedi wa Repubulika Iharanira Demokarasi ya Congo akanaba n’Umugaba w’Ikirenga w’Ingabo z’icyo gihugu, yirukanye burundu mu gisirikare ba Ofisiye bane bakuru.

Iteka rya Perezida Tshisekedi ryirukana aba basirikare ryasomewe kuri Radiyo na Televiziyo y’Igihugu (RTNC), ku wa Kane tariki ya 02 Kamena 2022.

Abirukanwe barimo umwe ufite ipeti rya Lieutenant Colonel n’undi wo ku rwego rwa Majoro.

Barimo: Lieutenant-colonel Kibibi Mutware, Major Sido Bizimungu alias America, Major Aruna Bovic na Major Mundande Kitambala.

Aba basirikare bakuru birukanwe mu gisirikare cya Congo Kinshasa mu gihe kimaze iminsi gihanganye mu mirwano na M23.

Iteka rya Perezida Tshisekedi ntiryasobanuye impamvu yafashe icyemezo cyo kwirukana bariya basirikare, gusa bikekwa ko bashobora kuba bakoranaga n’uriya mutwe.

Hari ibinyamakuru bivuga ko aba bofisiye baba bari basanzwe bakekwaho gukorana n’Ingabo z’u Rwanda.

Perezida Tshisekedi yirukanye bariya basirikare ku nama za Guverinoma iyobowe na Minisitiri w’Intebe, Sama Lukonde. Ni nyuma y’inama nkuru y’umutekano yateranye mu cyumweru gishize.

Iteka rigena ko icyemezo cyo kubirukana kigomba gushyirwa mu bikorwa na Minisitiri w’Ingabo ndetse n’abahoze mu ngabo, Gilbert Kabanda Rukemba.

Leave a Reply

Your email address will not be published.