Spread the love

Urukiko rwisumbuye rwa Musanze kuri uyu wa 28 Nyakanga 2022 rwahamije Muganga Maniriho Jean de Dieu icyaha cyo gusambanya umukobwa w’imyaka 17 y’amavuko, rumuhanaguraho ikindi cyo kumwica no kumukuriramo inda, rumukatira igifungo cy’imyaka 25.

Maniriho yatawe muri yombi tariki ya 9 Ugushyingo 2020 nyuma y’urupfu rw’uyu mukobwa witwaga Iradukunda Emerance muganga avuga ko yari umukunzi we biteguraga gushakana.

Icyo gihe umurambo wa Iradukunda wabonetse mu murima w’ibishyimbo, amaguru yawo aziritse, hari n’amaraso, bigaragara ko uyu mukobwa yari yishwe. Uwaketswe ni Maniriho.

Urukiko rwisumbuye rwanzuye ko icyaha cyo kwica Iradukunda kidahama Maniriho, rushingiye ku bisobanuro byatanzwe na muganga wafashe ibizamini by’umurambo.

Ibisobanuro by’uyu muganga byatesheje agaciro ibyavuye mu bipimo byafashwe na laboratwari y’igihugu ifata ibipimo bya gihanga, Rwanda Forensic Laboratory, byagaragazaga ko Maniriho yaba yaragize uruhare muri uru rupfu.

Rwanzuye kandi ko icyo gukurikiramo inda Iradukunda na cyo kidahama Maniriho, kuko ubushinjacyaha butagaragaje ibimenyetso bifatika bigaragaza ko uyu mukobwa yari atwite.

Urukiko rwisumbuye rwahamije Maniriho icyaha cyo gusambanya utagejeje ku myaka y’ubukure; icyaha gihanishwa igifungo cy’imyaka 25. Iki cyaha yacyemeye kuva ubwo yabazwaga mu bugenzacyaha.

Ubushinjacyaha bwari bwarasabye urukiko guhamya Maniriho ibi byaha byose, rukamukatira igifungo cya burundu.

Leave a Reply

Your email address will not be published.