Spread the love

Urukiko Rukuru, Urugereko rwihariye ruburanisha ibyaha mpuzamahanga n’ibyambukiranya imipaka rwahamije Jean-Baptiste Mugimba ibyaha bya Jenoside kandi rumuhanisha igifungo cy’imyaka 25.

Iki gihano yagikatiwe kuri uyu wa Kane, itariki ya 17 Werurwe ku cyicaro cy’urukiko mu Karere ka Nyanza mu Ntara y’Amajyepfo.

Mugimba yashinjwaga ibyaha byinshi byakoreye mu bice bya Nyakabanda na Nyamirambo ho mu Karere ka Nyarugenge muri Kigali.

Uyu mugabo w’imyaka 63 yoherejwe ava mu Buholandi mu 2016, kandi kuva icyo gihe yagiye mu nkiko, akurikiranyweho ibyaha birimojenoside, umugambi wo gukora jenoside, ubufatanyacyaha muri jenoside, gushishikariza rubanda gukora jenoside, ubwicanyi, ndetse no gutsemba nk’ibyaha byibasiye inyokomuntu nk’uko ubushinjacyaha bubitangaza.

Icyakora, urukiko rwamuhamije ibyaha bibiri birimo umugambi wo gukora jenoside n’ubufatanyacyaha muri Jenoside.

Mu Gushyingo 2012, u Rwanda rwatanze inyandiko y’ibirego ndetse n’icyemezo cyo guta muri yombi Mugimba wari umunyamabanga mukuru wa CDR mu gihe cya Jenoside, ishyaka ry’intagondwa abayoboke baryo bakaba baragize uruhare muri Jenoside.

Nyuma yaho, mu 2016 yoherejwe mu Rwanda icya rimwe na Jean Claude Iyamuremye wahamwe n’icyaha cya Jenoside akatirwa igifungo cy’imyaka 25 umwaka ushize.

Mugimba yahise abwira urukiko ko ashaka kujuririra iki cyemezo kandi biteganijwe ko azashyikiriza ubujurire bwe urukiko rw’ubujurire.

 

Leave a Reply

Your email address will not be published.