Spread the love

Minisitiri w’umutekano mu gihugu, Gasana Alfred, yatanze icyizere ko nta bisasu bizongera guterwa ku butaka bw’u Rwanda biturutse mu bihugu nka Repubulika ya Demukarasi ya Congo (RDC).

Minisitiri Gasana yabibwiye urubyiruko rw’abakorerabushake rwo mu ntara y’Amajyepfo ruri mu mahugurwa mu ishuri rya Polisi y’u Rwanda rya Gishari riherereye mu karere ka Rwamagana, kuri uyu wa 27 Nyakanga 2022.

Uyu muyobozi yavuze ko umutekano mu gihugu umeze neza, ari yo mpamvu abenshi mu bagerageje kuwuhungabanya baturutse muri Pariki ya Nyungwe (bari bagize umutwe wa FLN) bari mu maboko y’ubutabera.

Ati: “Umutekano mu gihugu umeze neza ariko ntidukwiye kwirara kuko n’iyo yaba umuntu umwe ugamije kuwuhungabanya dukwiye kumurwanya. Ngira ngo kandi mwese muzi ko abagerageje kuwuhungabanya banyuze muri Nyungwe hafi ya bose bari mu nkiko.”

Mu mirenge ya Kinigi na Nyange muri Werurwe, Gicurasi na Kamena 2022 hatewe ibisasu, igisirikare cy’u Rwanda (RDF) gisobanura ko byatewe n’ingabo za RDC zifatanya n’umutwe witwaje intwaro wa FDLR. Muri icyo gihe zari zikomeje guhangana n’umutwe wa M23.

Kuri ibi bisasu byo mu bwoko bwa roketi, Minisitiri Gasana yavuze ko ubuyobozi bw’u Rwanda bwabyitwayemo neza ku buryo bitazongera kubaho ko haraswa ibindi. Ati: “Mwumvise ibikorwa by’ubushotoranyi bwakozwe n’igihugu cy’abaturanyi cyateye ibisasu mu Kinigi, bigakomeretse abaturage bikanangiza imitungo yabo. Ariko ubuyobozi bwabyitwayemo neza kuburyo ibyo bitazongera kubaho.”

Ibi bisasu ndetse no kuba RDC ishinja u Rwanda gufasha M23 byakuruye umwuka mubi mu mubano w’ibihugu byombi, biba ngombwa ko byitabaza abahuze; ari bo umuryango w’akarere ka Afurika y’iburasirazuba (EAC) n’uw’akarere k’ibiyaga bigari (ICGLR). Biherutse kumvikana gukemura ibi bibazo biciye mu biganiro, kugira ngo byongere bibane neza.

Leave a Reply

Your email address will not be published.