Spread the love

Minisitiri w’ububanyi n’amahanga n’ubutwererane, Dr Vincent Biruta, yatangaje ko ingabo z’u Rwanda ziri mu butumwa bw’amahoro muri Repubulika ya Centrafrica zitazivanga muri politiki y’iki gihugu.

Minisitiri Biruta yabivugiye mu kiganiro kigufi yagiranye na radiyo mpuzamahanga y’Abafaransa, RFI, ati: “U Rwanda ntabwo rushobora kwivanga muri bibazo by’imbere birebana na politiki ya Repubulika ya Centrafrica.”

Umukuru wa dipolomasi y’u Rwanda yasobanuye ko iki gihugu cyohereje ingabo muri Centrafrica mu mpera z’2020 kugira ngo zirinde umutekano w’amatora yari yegereje, ubwo byagaragaraga ko ushobora guhungabana.

Yasubiyemo ati: “Ingabo zacu ntabwo zabayo kugira ngo zishyigikire umuntu cyangwa ngo zivange mu bibazo by’imbere bya politiki muri Repubulika ya Centrafrica. Ingabo zacu ziganje muri Bangui kandi icyo zishinzwe si ukurinda inzego gusa n’abatuye Bangui na Centrafrica, ahubwo ni no gushyigikira gahunda y’impinduka mu rwego rw’umutekano rwa Repubulika ya Centrafrica.”

Minisitiri Biruta yasubizaga umuryango wo muri Centrafrica uharanira iyubahirizwa ry’Itegekonshinga ryo ku wa 30 Werurwe 2016, wagaragarije impungenge mu nama ya G16 z’uko ingabo z’u Rwanda zaba zaragiye gufasha Perezida Faustin-Archange Touadéra ngo azayobore manda ya gatatu.

Iri tegekonshinga ryemerera Umukuru w’Igihugu kuyobora manda ebyiri gusa.

Leave a Reply

Your email address will not be published.