Spread the love

Umutwe witwaje intwaro wa M23 uvuga ko wongeye kugabwaho ibitero n’ingabo za Repubulika ya Demukarasi ya Congo, FARDC, zifatanyije n’iziri mu butumwa bw’amahoro bw’Umuryango w’Abibumbye, MONUSCO.

Bertrand Bisimwa uhagarariye M23 mu rwego rwa politiki, yatangaje ko ibitero byagabwe ku birindiro byabo biri muri gurupoma ya Jomba muri teritwari ya Rutshuru, guhera mu masaa kumi n’imwe y’igitondo cy’uyu wa 6 Kamena 2022.

Yagize ati: “Mu mugambi wo gusuzugura ibiganiro by’i Nairobi byasabwe n’akanama ka UN gashinzwe umutekano, FARDC n’abafatanyabikorwa bagabye ibitero ku birindiro bya M23 muri Jomba guhera saa kumi n’imwe z’iki gitondo. Ukwinjira kwa MONUSCO muri iyi mirwano guhabanye n’ubusabe bw’akanama ka UN gashinzwe umutekano.”

Abafatanyabikorwa M23 ivuga muri iyi mirwano, ni imitwe yitwaje intwaro irimo FDLR ikomoka mu Rwanda n’indi ikomoka imbere mu gihugu irimo Nyatura CMC.

M23 itangaje ko yagabweho ibitero nyuma y’iminsi 3 itanze impuruza y’uko FARDC imaze iminsi ibyitegura, aho ngo yohereje abasirikare benshi n’intwaro nshya hafi y’ibirindiro byayo.

Tariki ya 3 Kamena 2022, Umuvugizi wa M23, Maj. Willy Ngoma, yari yatangaje ko FARDC ishobora kubyuka ibagabaho ibitero, gusa ntabwo byabaye nk’uko uyu musirikare yari abyiteze.

FARDC ntabwo iratangaza niba koko yagabye ibi bitero kuri M23, gusa Umuvugizi wa guverinoma ya RDC, Patrick Muyaya tariki ya 31 Gicurasi 2022 yatangaje ko nta biganiro by’amahoro bazagirana n’umutwe w’iterabwoba, ngo ahubwo hazifashishwa imbaraga z’igisirikare.

Leave a Reply

Your email address will not be published.