Spread the love

Nyuma yo ituze mu turere tw’imirwano hagati y’ingabo za FARDC n’inyeshyamba za M23, imirwano yongeye kubura ku mugoroba wo ku wa Kane ushize ahantu hatandukanye muri Teritwari ya Rutshuru, aho bivugwa ko FARDC yasubije inyuma ibitero bya M23 ishaka kwigarurira ikigo cya gisirikare cya Rumangabo.

Amakuru aturuka mu gisirikare yemeza ko imirwano ikomeje kubera i Kanombe, Nkokwe, Katagara, hafi ya Rumangabo. Nk’uko ayo makuru abitangaza, uyu mutwe ubu ufatwa nk’uw’iterabwoba na Guverinoma ya RDC, wagabye ibitero bishya ku birindiro by’ingabo za leta, ushaka kwigarurira ikigo cya gisirikare cya Rumangabo kugira ngo ugenzure umuhanda uhuza Goma na Rutshuru.

Ku murongo w’imbere, ibitero byo gusubiza inyuma ibitero bya M23 byatangijwe na FARDC nk’uko iyi nkuru dukesha Politico.cd ikomeza ivuga. Imirwano ngo ikaba ikomereje muri groupement ya Bweza (hafi ya Ntamugenga na Rubare) no muri groupement rya Gisigari (hafi y’ikigo cya gisirikare cya Rumangabo). Amakuru aturuka muri ako gace avuga ko M23 yigaruriye imisozi ihakikije.

Byongeye kandi, iyi mirwano niyo ntandaro y’ihunga ry’abaturage bagerageza gushaka uduce dutekanye. Kuva nijoro, nk’uko amakuru atandukanye aturuka aho avuga, abasivili benshi bahunze berekeza i Rumangabo rwagati aho bacumbikiwe mu mashuri yaho.

Leave a Reply

Your email address will not be published.