Spread the love

Umutwe wa M23 watangaje ko wabaye uhagaritse imirwano wari umazemo iminsi n’Ingabo za Repubulika Iharanira Demokarasi ya Congo (FARDC).

Ni ibikubiye mu itangazo uyu mutwe wasohoye ku mugoroba w’ejo ku wa Gatanu ryashyizweho umukono n’umuvugizi wawo, Major Willy Ngoma.

M23 yari imaze iminsi mu mirwano na FARDC yaberaga muri Teritwari ya Rutshuru ho mu ntara ya Kivu y’Amajyaruguru.

Ku wa 28 Werurwe FARDC yavuze ko uyu mutwe wagabye igitero gikomeye ku birindiro by’Ingabo zayo biri mu duce twa Chanzu na Runyoni mu Rutshuru, gusa ntiyavuga niba hari abasirikare bayo baba bishwe.

Imirwano y’impande zombi yatumye ibihumbi by’abaturage ba RDC bahungira muri Uganda, ndetse yahanuriwemo na kajugujugu y’ubutumwa bwa Loni bwo kugarura amahoro muri RDC (MONUSCO) yarimo abasirikare umunani.

M23 mu itangazo ryayo, yavuze ko yahisemo kuva mu bice yari yarafashe igasubira mu birindiro by’ubwirinzi, mu rwego rwo “kugira ngo habe akarere kagari kadutandukanya n’Ingabo za Leta mu kwirinda imirwano.”

Ibirindiro abarwanyi b’uyu mutwe basubiyemo ni ibiri mu misozi ya Chanzu na Runyoni.

Uyu mutwe kandi wavuze ko wafashe iki cyemezo mu rwego rwo kugira ngo noneho hagenzurwe neza uruhande ubushotoranyi buzaturukaho.

Wakomeje ugira uti: “Ku bw’ibyo, guhera kuri uyu wa Gatanu tariki ya 01 Mata uboneyeho gutangaza ko uhagaritse imirwano mu rwego rwo kwemerera ubuyobozi bwa RDC gutangiza ibiganiro by’amahoro bigamije gukemura amakimbirane amakimbirane twagiranye kuva mu myaka hafi 10 ishize.”

Wavuze ko cyakora ufite uburenganzira bwo “kwitabara mu buryo bukomeye”, mu gihe wakongera guterwa n’ingabo za FARDC.

Kugeza ubu Igisirikare cya DR Congo ntacyo kiratangaza kuri aya makuru yatangajwe na M23.

Cyakora cyo hari amakuru avuga ko Guverinoma ya RDC yaba yatangiye ibiganiro bigamije gusuzuma ibyo M23 yifuza kugira ngo irambike burundu intwaro, nyuma y’uko impande zombi zisinyanye amasezerano y’amahoro yashyiriweho umukono i Addis Ababa muri 2013.

Leave a Reply

Your email address will not be published.