Spread the love

Ba Perezida Paul Kagame w’u Rwanda na Félix Antoine Tshisekedi wa Congo Kinshasa, bemeranyije ko bagomba gutsinda burundu umutwe wa FDLR n’indi mitwe iwushamikiyeho; nyuma y’igihe iteza umwuka mubi hagati y’u Rwanda na RDC.

Abakuru b’ibihugu byombi kuri uyu wa Gatatu tariki ya 06 Nyakanga bari bahuriye i Luanda muri Angola, mu nama yigaga ku kibazo cy’umutekano muke uri mu Burasirazuba bwa Congo.

Ni inama yabaye ku butumire bwa Perezida João Lourenço wa Angola, ari na we muhuza mu biganiro bigamije gucubya umwuka mubi umaze igihe hagati y’impande zombi.

Congo Kinshasa imaze igihe yarahagaritse amasezerano yari yarasinyanye n’u Rwanda ndetse inakumira indege za RwandAir ku butaka bwayo, nyuma yo kurushinja gufasha inyeshyamba z’umutwe wa M23 zimaze igihe mu mirwano n’Ingabo zayo.

Ni ibirego uruhande rw’u Rwanda rumaze igihe ruhakana, ahubwo rugashinja Ingabo za Congo Kinshasa (FARDC) kugirana imikoranire n’umutwe wa FDLR ugamije kuruhungabanyiriza umutekano.

Bivugwa ko FARDC iri gufatanya na FDLR mu mirwano ihanganyemo na M23, ndetse mu minsi yashize u Rwanda rwavuze ko barashe ibisasu ku butaka bwarwo inshuro eshatu.

Mu rwego rwo gucubya umwuka mubi umaze igihe ututumba hagati y’ibihugu byombi, inama ya Luanda yemeje umurongo wo gukemura ibibazo biri hagati y’ibihugu byombi birimo n’icy’umutwe wa FDLR, aho byemejwe ko uyu mutwe n’indi iwushamikiyeho igomba kurandurwa.

Umwe mu myanzuro y’inama uvuga ko hanzuwe “gutsinda FDLR n’indi mitwe iyishamikiyeho (CNRD-FLN, RUD-Urunana, FPPH-Abajyarugamba) igira uruhare mu makimbirane y’u Rwanda na RDC ndetse ikanagira uruhare mu guteza umutekano muke muri RDC.”

Hahise hanemezwa ko impande zombi zongera “kubyutsa itsinda ry’ubutasi rihuriweho n’u Rwanda na RDC” ari na ryo rizashyiraho gahunda y’uko FDLR igomba kurwanywa, ibisobanura ko hashobora kuzifashishwa ingufu za gisirikare mu kuyihashya.

Cyakora bijyanye n’Abanyarwanda bamaze igihe mu mashyamba ya Congo, inama yemeje ko hagomba gushyirwaho ’amabwiriza’ yorohereza impunzi gutahuka.

Indi ngingo yaganiriweho ni iyerekeye umutwe wa M23, maze hanzurwa ko ihagarika imirwano ndetse abarwanyi bayo bakava mu mujyi wa Bunagana no mu tundi duce wafashe.

Uruhande rw’u Rwanda cyakora cyo ruvuga ko ikibazo cy’uyu mutwe kigomba gukemurirwa imbere mu gihugu (DRC) hagendewe ku myanzuro y’inama y’abakuru b’ibihugu bya EAC yabereye i Nairobi.

Imyanzuro y’iyi nama yasabye M23 na FARDC guhagarika imirwano, ahubwo bagakemura ibibazo bafitanye bisunze inzira ya Politiki.

Mu rwego kandi rwo kumenya ukuri ku birego u Rwanda na RDC bashinjanya byerekeye iriya mitwe yombi, byemejwe ko Angola igomba kugenzura ibirego buri gihugu kimaze igihe gishyira ku kindi binyuze mu rwego rushinzwe kubigenzura rugiye gushyirwaho, rukazaba ruyobowe n’umwe muri ba Jenerali mu ngabo za Angola.

Leave a Reply

Your email address will not be published.