Spread the love

Kabahizi Fridaus ushinja umukinnyi wa filimi Uwihoreye Jean Bosco wamamaye nka Ndimbati kumusambanya, akamutera inda, yamara kubyara abana b’impanga akamutererana, avuga ko yashenguwe no kumva umuyobozi w’umuryango Transparency International Rwanda urwanya ruswa n’akarengane, Ingabire Marie Immaculée yemeza ko yabeshye imyaka y’amavuko.

Kabahizi mu kiganiro yagiriye kuri Isimbi TV, yabwiye umunyamakuru ko mu 2019 ubwo yari afite imyaka 17 y’amavuko, Ndimbati yamusindishije yifashishije inzoga yitwa Amarula, hanyuma aramusambanya. Ngo yaje kubyara aba bana, uyu mukinnyi wa filimi arabatererana, ntiyabitaho.

Nyuma y’iminsi ibiri iki kiganiro gitambutse, urwego rw’igihugu rushinzwe ubugenzacyaha, RIB, tariki ya 10 Werurwe 2022 rwatangaje ko rwataye muri yombi Ndimbati, rumukurikiranyeho icyaha cyo gusambanya umwana utagejeje ku myaka y’ubukure (18 y’amavuko); ari we Kabahizi.

Immaculée mu kiganiro yagiriye kuri Yago TV Show ubwo Ndimbati yari amaze umunsi atawe muri yombi, yavuze ko afite amakuru yizewe yemeza ko uyu mukinnyi wa filimi yasambanye na Kahabizi ubwo uyu ‘mukobwa’ yari afite imyaka y’ubukure.

Yagize ati: “Uriya mwana w’umukobwa, amakuru mfite kugeza ubu, yari arengeje imyaka y’ubukure, yari arengeje imyaka 18. Yego ntabwo yari ayirengeje cyane ariko itegeko rirasobanutse kandi burya n’iyo ari ukwezi kumwe, uba uyirengeje.”

Immaculée yemera ko Kabahizi ashobora kuba yaravutse mu Kuboza 2002 nk’uko abivuga, ariko ubutabera mu guca urubanza bukazagendera ku itariki yanditse mu irangamimerere, ari yo ya 1 Mutarama. Ngo aho ngaho, Ndimbati ntiyaba agikurikiranweho icyaha cyo gusambanya umwana.

Soma inkuru yose ya Immaculée hano https://bwiza.com/?Ingabire-Immaculee-ngo-afite-amakuru-yizewe-y-uko-Fridaus-yatewe-inda-na

Kabahizi mu kiganiro yagiriye kuri Megapex TV ubwo Ndimbati yari amaze kuburanishwa ku ifungwa n’ifungurwa ry’agateganyo kuri uyu wa 23 Werurwe 2022, yabajijwe niba yarumvise amagambo Immaculée yamuvuzeho.

Yasubije ati: “Narabibonye birambabaza, numva umutwe urandiye pe! Ndavuga nti ‘Noneho ibyanjye babishyize mu bikorwa’ kuko ntabwo niyumvishaga ukuntu noneho umuntu w’umuyobozi nk’uriya ufite inshingano zimeze kuriya mu gihugu yakwifata akajya mu itangazamakuru, akavuga amakuru adahagazeho.”

Tariki ya 14 Werurwe 2022 ku mbuga nkoranyambaga hasakaye amakuru avuga ko Ndimbati yafunguwe, bamwe mu bayemezaga bashingiraga ku byo Immaculée yari aherutse gutangaza. Gusa RIB yaje kunyomoza aya makuru, ivuga ko hari ibimenyetso bifatika bituma uyu mukinnyi wa filimi akomeza gukurikiranwaho iki cyaha, inemeza ko dosiye ye ishyikirizwa Ubushinjacyaha.

Umuvugizi wa RIB, Dr Murangira Thierry icyo gihe yamenyesheje itangazamakuru ati : “Aracyafunze by’agateganyo, iperereza rirakomeje ku cyaha acyekwaho cyo gusambanya umwana, kandi hari ibimenyetso bifatika bituma agumya gucyekwaho kuba yarakoze icyaha. Dosiye ye irashyikirizwaubushinjacyaha mu gihe cyagenwe n’itegeko.”

 

Leave a Reply

Your email address will not be published.