Spread the love

Sosiyete Sivile yitwa Forces Vives ikorera mu mujyi wa Goma muri Repubulika ya Demukarasi ya Congo (RDC) yahamagariye Abanyekongo bose bawubamo kwifatanya na wo mu myigaragambyo yamagana Leta y’u Rwanda n’iya Uganda.

Perezida w’uyu muryango, Ir Mario Ngavho Kambale mu itangazo yashyizeho umukono kuri uyu wa 14 Kamena 2022, yasobanuye ko impamvu yo kwamagana izi Leta zombi ari uko ngo zifasha umutwe witwaje intwaro wa M23 uhanganye n’ingabo zabo, FARDC.

Yagize ati: “Ubuhuzabikorwa bwa Forces Vives i Goma burahamagarira abaturage b’i Goma no mu nkengero zaho kwitabira imyigaragambyo y’amahoro kuri uyu wa Gatatu tariki ya 15 Kamena 2022 yo kwamagana ubushotoranyi bw’u Rwanda, yo gushyigikira FARDC iri ku rugamba rwo kurwanya ibyihebe bya M23 n’abafatanyabikorwa babyo b’Abanyarwanda na Uganda.”

Iyi sosiyete sivile yateganyije ko iyi myigaragambyo iratangira saa mbiri (saa moya ku masaha y’i Goma), ihere ku biro bya Guverineri w’intara ya Kivu y’Amajyaruguru, irangirire ku masangano ya Cercle Sportif.

Ubukangurambaga bushinja Leta y’u Rwanda gufasha M23 burakomeje muri RDC, mu gihe ibihakana, isobanura ko nta nyungu yagira mu kwinjira mu kibazo kireba Abanyekongo.

Kuri Uganda, bamwe mu basirikare ba FARDC, imiryango nka LUCHA ndetse n’abaturage bashinja ingabo zayo gufasha M23, ariko Leta yabo ntirasohora itangazo ribihamya nk’uko yabigenje ku Rwanda.

Leave a Reply

Your email address will not be published.