Spread the love

Umugaba w’ingabo za Uganda zirwanira ku butaka akaba n’umujyanama wa Perezida Yoweri Museveni mu by’umutekano, Lt Gen. Muhoozi Kainerugaba, kuri uyu wa 16 Werurwe 2022 yasoje uruzinduko yagiriraga mu Rwanda.

Iyi nkuru yemejwe na Ambasade ya Uganda mu Rwanda mu masaha abiri ashize. Yagize iti: “Lt. Gen. Muhoozi Kainerugaba, Umugaba w’ingabo zirwanira ku butaka za UPDF avuye i Kigali nyuma y’uruzinduko bwite rw’iminsi itatu rwatangiye tariki ya 14 rurangira ku ya 16 Werurwe 2022.”

Gen. Kainerugaba ubwo yageraga mu Rwanda, yakiriwe n’abahagarariye Ambasade ya Uganda, Umuyobozi w’umutwe w’ingabo zirinda abayobozi bakuru, Gen. Willy Rwagasana n’Umuvugizi w’ingabo z’u Rwanda, Col. Ronald Rwivanga.

Yaje kwakira na Perezida wa Repubulika, Paul Kagame, bagirana ibiganiro birebana n’uburyo ibihugu byombi byakemuta ibibazo byatumye umubano wabyo uba mubi.

Uyu musirikare kandi kuri uyu wa 15 Werurwe yasuye urwibutso rwa jenoside yakorewe Abatutsi rwa Kigali, yunamira abahashyinguwe, ndetse n’ingoro y’Inteko Ishinga Amategeko y’u Rwanda ibumbatiye amateka y’urugamba rwo kubohora igihugu.

Gen. Kainerugaba yasuye inyubako ya Kigali Arena iberamo ibitaramo, imihango itandukanye n’imikino irimo Basketball na Volleyball.

Nk’uko ibiro by’Umukuru w’Igihugu byabitangaje, Gen. Kainerugaba yanajyanye na Perezida Kagame mu rwuri rw’inka ze ruri ku nkengero z’ikiyaga cya Muhazi, amugabira inka z’Inyambo zitamenyekanye umubare.

Leave a Reply

Your email address will not be published.