Spread the love

Lt Gen Muhoozi Kainerugaba yatangaje ko afite icyizere cy’uko ba Perezida Paul Kagame w’u Rwanda, se Yoweri Museveni wa Uganda na Félix Tshisekedi wa RDC mu gihe cya vuba bazabonera igisubizo ikibazo cy’umutwe wa M23.

Uyu musirikare usanzwe ari Umugaba w’Ingabo za Uganda zirwanira ku butaka yabitangaje mu butumwa yanditse kuri Twitter ye, agaragaza ko ikibazo cya M23 ari ikibazo byoroshye cyane gushakira igisubizo, kuko uyu mutwe ntaho uhuriye n’uwa ADF.

Ati: “Nizeye aba baperezida batatu b’ibihangange b’ibihugu byacu ko bazakemura vuba ikibazo cya M23. M23 mu by’ukuri ni ikibazo cyoroshye cyane gukemura. Urugero ntabwo ari mbi cyane nka ADF. Cyakemuka byoroshye cyane ibihombo bikaba bito.”

Ubu butumwa bwari buherekeje amafoto atatu arimo iya Perezida Kagame, Museveni na Tshisekedi.

Gen Muhoozi yanditse ubu butumwa nyuma y’amasaha make ba Perezida Kagame, Museveni n’abandi bagize EAC bemeje burundu Repubulika Iharanira Demokarasi ya Congo nk’igihugu cya karindwi kinyamuryango cy’uyu muryango wa Afurika y’Iburasirazuba.

Congo Kinshasa yinjiye bidasubirwaho muri EAC mu gihe Ingabo zayo zimaze iminsi zihanganye mu mirwano iri kubera mu Rutshuru n’inyeshyamba za M23.

Iki gihugu giheruka gushyira mu majwi u Rwanda gishinja ingabo zarwo kugira uruhare muri iriya mirwano, ibyo Guverinoma y’u Rwanda yamaganiye kure ivuga ko nta nyungu ifite muri iyo mirwano.

Hari amakuru kandi avuga ko Ingabo za Uganda kuva ku wa Kabiri zinjiye ku butaka bwa RDC, mu rwego rwo gutera inkunga ingabo z’iki gihugu ngo zitamburwa agace ka Bunagana na M23.

Ni amakuru uyu mutwe washimangiye mu itangazo waraye usohoye.

Uti: “FARDC iritabaza inzira zose zishoboka kugira ngo itumire ingabo z’amahanga ngo zize ku ruhande rwayo mu mirwano, gusa nta wabura kuvuga ko nta ntambara n’imwe bigeze batsinda.”

M23 kugeza ubu ishinja Guverinoma ya RDC kutubahiriza ibikubiye mu masezerano ya Addis Ababa impande zombi zashyizeho umukono muri 2013, gusa ihakana kugaba ibitero ku birindiro by’Ingabo zayo.

Kugeza ubu ntibiramenyekana niba u Rwanda na Uganda baba bafite gahunda yo kongera guhuza impande zombi mu biganiro cyangwa bazohereza ingabo zo gutera ingabo mu bitugu FARDC.

Leave a Reply

Your email address will not be published.