Spread the love

Umuvugizi wa polisi y’u Rwanda, CP John Bosco Kabera, avuga ko amabwiriza mashya agenga ubucuruzi bw’ibikoresho by’ikoranabuhanga, azatuma igisambo ubwacyo kitangaho amakuru ndetse n’ay’ibyo cyibye bityo byorohe kugikurikirana.

Kuva tariki ya 11 Nyakanga 2022 hamaze gushyirwaho amabwiriza agenga ubucuruzi bw’ibikoresho y’amashanyarazi n’iby’ikoranabuhanga byakoreshejwe.

Zimwe mu ngingo ziyakubiyemo harimo ko ubicuruza agomba kuba afite icyemezo cya RDB, kugaragaza inkomoko y’ibyo acuruza n’urutonde rwabyo, gutanga inyemezabwishyu no kugira umwirondoro w’uwo aguze nawe igikoresho.

CP Kabera yabwiye RBA ko aya mabwiriza afite akarusho.

Yagize ati ” Aya mabwiriza afite akarusho kuko igisambo kizajya cyitangaho amakuru ndetse gitange n’amakuru y’ibyo cyibye. Ayo makuru ubundi ntitwayagiraga. Twagombaga kugifata kugira ngo kibazne kiduhe ayo makuru. Nudatanga ayo makuru icyo ugurisha ntabwo uzakigurisha.”

Afande Kabera yavuze ko nibiba gutyo hari abazishora mu buzunguzayi, kandi nabwo polisi itazaburebera.

Umuyobozi mukuru w’ikigo gishinzwe ubuziranenge, ihiganwa mu bucuruzi no kurengera umuguzi, RICA, Uwumukiza Beatrice, asobanura ko kugira amakuru ku muguzi n’ugurisha ibikoresho by’ikoranabuhanga byakoze bigamije guca akajagari gakunze kugaragara mu bucuruzi bw’ibi bikoresho.

Kugeza ubu abagera kuri 14 bamaze gusaba ibyemezo byo gukora byemewe n’amategeko bakazemererwa uruhushya rw’imyaka ibiri mbere yo gusurwa no gukorerwa ubugenzuzi, gusa ntibibuza ko abazanyuranya n’amabwiriza bazafungirwa ibikorwa byabo by’agateganyo cyangwa burundu bitewe n’uburemere bw’amakosa yakozwe.

Leave a Reply

Your email address will not be published.