Spread the love

Ukuriye ikigo cy’ubutasi bwo hanze cya Amerika (CIA), William Burns , yavuze ko Perezida Vladimir Putin w’Uburusiya yari yarateguye ko azafata umurwa mukuru Kyiv wa Ukraine mu minsi ibiri, kuba ubu umunsi ubaye uwa 14, ngo ararakaye cyane bikomeye.

Yavuze ibi kuwa kabiri abwira abagize inteko ya Amerika, ndetse ababurira ati: “Ntekereza ko Putin arakaye kandi ubu yavangiwe. Ashobora gukaza ibitero agerageza gusenya igisirikare cya Ukraine atitaye ku basivile babigwamo.”

Burns yavuze ko Putin yari imyaka myinshi “afite umujinya n’imigambi”. Avuga ko ibi bitero yatangaije kuri Ukraine ari “igikorwa cyimbitse cyo gukora ibyo yagambiriye we bwite”.

Kuri ubu umunsi wa 14 w’ibitero by’Uburusiya muri Ukraine urihiritse Putin atarakoza intoki ku mujyi wa Kyiv.

Ibiro bikuru bya gisirikare muri Ukraine byatangaje mu gitondo cyo kuwa gatatu ko ingabo zirinze umurwa mukuru Kyiv “zirimo gusubiza inyuma ibitero by’umwanzi” kandi “zihagaze bwuma mu birindiro” byazo.

Itangazo ry’ibi biro – ibyo rivuga ntibyagenzuwe na BBC dukesha iyi nkuru mu buryo bwigenga – rivuga ko ingabo z’Uburusiya “zahatakarije cyane” kandi zikomeje ibikorwa byo kwinjiza abarwanyi b’abacancuro mu ngabo zabo.

Igisirikare cy’Uburusiya ntacyo kiravugwa kuri raporo yatanzwe n’ingabo za Ukraine.

Amakuru yaherukaga gutangwa n’ingabo za Ukraine kuwa kabiri saa 22:00(GMT) yavugaga ko ibitero by’Uburusiya byagabanutse mu masaha 24 yari ashize.

Kuwa Gatatu mu gitondo kare cyane mu mijyi itandukanye ya Ukraine harimo n’umurwa mukuru humvikanye intambaza zivuza iya bahanda ziburira abantu ko ibisasu by’Uburusiya bigiye kongera kuraswa.

Ahagana saa kumi n’ebyiri z’igitondo mu murwa mukuru Kyiv hatangiye kumvikana ibisasu mu mpande zitandukanye, nk’uko abanyamakuru bahari babivuga.

Mu ijoro, Perezida Volodymyr Zelensky wa Ukraine yavuze ijambo bitunguranye ari mu biro bye i Kyiv abwira abagize inteko ishingamategeko y’Ubwongereza.

Leave a Reply

Your email address will not be published.