Spread the love

Ababyeyi bo mu Karere ka Bugesera basabwe kwirinda kubeshya abana babo igihe babajije ibijyanye n’ubuzima bw’imyororokere, kuko bishobora gutuma bajya kwishakira amakuru bakaba bahabwa atari yo abashyira mu kaga.

Byatangarijwe mu mahugurwa yateguwe n’umuryango, Youth Mentoring Agents for Development Organisation, Yomado, ubwo hasobanurwaga politiki n’amategeko bijyanye n’ubuzima bw’imyororokere. Aya mahugurwa yabereye mu Karere ka Bugesera mu Murenge wa Ruhuha.

Ibi byitezweho gufasha mu kuganiriza abangavu n’ingimbi ibijyanye n’ubuzima bw’imyororokere hakiri kare, binabafasha mu kugabanya umubare w’abangavu baterwa inda n’abanduzwa indwara zandurira mu mibonano mpuzabitsina.

Umuyobozi Mukuru wa Yomado, Nshimiyimana Emmanuel, yavuze ko hari ingero nyinshi zagiye zigaragara, aho abana baterwa inda biturutse ku makuru y’ibihuha bahawe na bagenzi babo.

Yagize ati “Hari aho byagiye bigaragara ko abana bahabwa amakuru y’ibihuha aho umwana bamubwira bati ‘imihindagurikire iri kuba ku mubiri wawe, ukoze imibonano mpuzabitsina yakubera igisubizo’, rimwe na rimwe bikamuviramo ingaruka zishingiye ku kubeshywa. Zimwe mu ngaruka zirimo inda z’imburagihe, indwara zifatira mu myanya ndangagitsina, kuba yashinga urugo imburagihe, guta ishuri n’ibindi.”

Impuguke mu buzima bw’imyororokere, Dr Nzabonimpa Anicet yavuze ko ababyeyi bakwiriye gutinyuka bakabwiza ukuri abana babo ku bijyanye n’imyororokere.

Ati “Ababyeyi bakwiye kwigisha hakiri kare abana babo ku bijyanye n’ubuzima bw’imyororokere. Umubyeyi akwiriye kuganiriza umwana ubuzima bw’imyororokere atamubeshya, wa wundi utangiye kuvuga ubaza uti ‘aka ni agaki’ ntabwirwe ko ari agapipi, ahubwo abwirwe ko ari igitsina cye mu izina ryacyo. Ibyo byose azakura abizi ku buryo bizamufasha kwirinda abamushora mu ngeso mbi z’ubusambanyi.”

Nzabonimpa yavuze ko umwana iyo abeshywe, akurana amakuru atari yo, akaba yanashakisha n’amakuru ahandi hashobora gushyira ubuzima bwe mu kaga.

Mukashyaka witabiriye aya mahugurwa, yavuze ko amasomo bahawe yabafashije, nabo bakaba bagiye kuyifashisha mu gusobanurira abangavu n’ingimbi ibijyanye n’imyororokere yabo.

Ati “Nubwo n’umwana akwiriye kubigiramo uruhare ariko na none umuryango cyane cyane ababyeyi bagira uruhare runini mu gufasha umwana kumenya ubuzima bw’imyororokere bityo akava mu rujijo akagira amakuru y’ukuri ku buzima bwe.”

Mugiraneza ufite abana bane, akaba atuye mu murenge wa Ngeruka yagize ati “Buriya ugira amahirwe agira umwana umubaza aho kugira ngo ajye kubishaka hirya ahabwe ibitari byo. Hari abagenda bakifatira amakuru bakuye hirya no hino, mu bana bagenzi babo, ugasanga ntabwo ariyo akabageza ku kaga ko gutwara inda zitateguwe no kwandura indwara zifata mu myanya ndangagitsina.”

Umunyamabanga Nshingwabikorwa w’Umurenge wa Ruhuha, Vital Ruzagiriza, yashishikarije ababyeyi kugira uruhare mu burere bw’abana babo by’umwihariko ku buzima bw’imyororokere, abasaba kuba umusemburo w’impinduka nziza, banageza ubumenyi bahawe ku bandi babyeyi.

Ati “Mufite abana bari ku mashuri, aya makuru mukuye aha mugende muyasangize abandi murusheho kwigisha abana banyu ubuzima bw’imyororokere kuko bizabafasha kwirinda ababashukisha impano zitandukanye bagamije kubasambanya.”

Aya mahugurwa yatewe inkunga n’umuryango Plan International, bikaba byitezwe ko azagera ku bandi babyeyi mu bice bitandukanye mu gihugu.

Leave a Reply

Your email address will not be published.