Spread the love

Guverinoma ya Repubulika ya Demukarasi ya Congo, RDC, imaze gutangaza ko abantu barenga 5 bapfiriye mu myigaragambyo irwanya misiyo y’amahoro y’Umuryango w’Abibumbye (MONUSCO) i Goma, abandi babarirwa muri 50 barakomereka.

Umuvugizi wa guverinoma, Patrick Muyaya, yabyemereje mu butumwa yatangarije kuri Twitter kuri uyu wa 26 Nyakanga 2022. Yagize ati: “Goma, abatari munsi ya 5 bapfuye, ababarirwa muri 50 bakomeretse, turagaruka hamwe na Khassim Diagne muri Briefing Special ku bijyanye n’abantu n’ibintu byagizweho ingaruka. Turanavuga kuri gahunda ya MONUSCO yo gutaha yamaze gutangira.”

Iyi myigaragambyo yabaye kuri uyu wa 25 Nyakanga, abaturage binjira mu kigo cya MONUSCO, batwika bimwe mu bikoresho birimo ibyari mu biro by’abakozi b’iyi misiyo, binjira mu bubiko bw’ibiribwo, barasahura, basubizwa inyuma n’ibyuka biryani mu maso batewe. Yakomereje mu mujyi wa Goma kuri uyu wa 26.

Abaturage bigaragara ko barakaye cyane, barasaba MONUSCO kuva mu gihugu cyabo, kuko ngo yananiwe gufasha ingabo za Leta kurwanya imitwe yitwaje intwaro ihungabanya umutekano wo mu burasirazuba bw’igihugu no kugarura ibice byafashwe n’umutwe wa M23, by’umwihariko umujyi wa Bunagana uri ku mupaka wa RDC na Uganda.

Leave a Reply

Your email address will not be published.