Spread the love

Abarwanyi benshi b’umutwe witwaje intwaro wa FDLR urwanya Leta y’u Rwanda bagaragaye bacinya akadiho mu gace ka Rumangabo, teritwari ya Rutshuru, intara ya Kivu y’Amajyaruguru muri Repubulika ya Demukarasi ya Congo (RDC).

Urubuga Goma 24 rwashyize hanze videwo (video) y’amasegonda 34 y’aba barwanyi rwemeza ko yafashwe kuri uyu wa 8 Kamena 2022, bambaye impuzankano z’igisirikare cya RDC zivanze n’imyambaro ya gisivile, baririmba indirimbo zisanzwe mu gisirikare.

Aba barwanyi kandi bagaragara bafite imbunda ziganjemo Ak-47 ndetse bamwe muri bo bikoreye udufuka n’ibikapu.

Reba videwo https://video.twimg.com/ext_tw_video/1534883872021827585/pu/vid/640×352/a8dAfKmw-TDISs5Q.mp4?tag=12

Iyi videwo igiye hanze mu gihe Leta y’u Rwanda ishinja igisirikare cya RDC kizwi nka FARDC na Leta muri rusange gukorana n’uyu mutwe witwaje intwaro, cyane muri iki gihugu gihanganye na M23.

Gusa Umuvugizi wa FARDC, Gen. Léon-Richard Kasonga, mu kiganiro yagiranye n’abanyamakuru tariki ya 31 Gicurasi 2022, yatangaje ko FDLR yasenyutse ku buryo itari ikibazo ku mutekano wa RDC n’u Rwanda.

Gen. Kasonga yasobanuye ko abarwanyi bake ba FDLR bakigaragara baba bari mu matsinda mato y’abatarenze 9, bishakira ibiribwa n’imiti.

FDLR ni umutwe ugizwe n’abahoze mu ngabo z’u Rwanda (Ex-FAR) no mu mutwe w’Interahamwe wifashishijwe mu gushyira mu bikorwa jenoside yakorewe Abatutsi. Imaze imyaka 22 ikorera ku butaka bwa RDC.

Aba barwanyi bagaragaye kuri uyu wa Gatatu

Leave a Reply

Your email address will not be published.