Spread the love

Abakuru b’ibihugu bigize umuryango wa Afurika y’iburasirazuba (EAC) muri iki cyumweru barahurira mu nama izabera ku cyicaro cyawo, mu mujyi wa Arusha muri Tanzania.

Nk’uko uyu muryango umaze kubitangaza, tariki ya 21 Nyakanga 2022, aba bakuru b’ibihugu bazagira inama yo ku rwego rwo hejuru yerekeye isoko rusange, baganire ku buryo amasezerano aryerekeye yashyirwa mu bikorwa.

Tariki ya 22 Nyakanga, bazagira inama isanzwe ya 22 y’abakuru b’ibihugu yiga ku ngingo zitandukanye zerekeye uyu muryango. Insanganyamatsiko yayo izaba ari “Ugukomeza ukwihuriza hamwe no kwagura ubufatanye”.

Abakuru b’ibihugu bya EAC baherukaga guhurira i Nairobi muri Kenya tariki ya 20 Kamena 2022, mu nama y’umutekano yibandaga ku ntambara iri kubera mu burasirazuba bwa Repubulika ya Demukarasi ya Congo *RDC) no ku makimbirane iki kibazo gifitanye n’u Rwanda.

Bafashe umwanzuro ushimangira uwo bari barafashe tariki ya 21 Mata 2022, basaba imitwe yitwaje intwaro ikomoka muri RDC kuzirambika, ikajya mu biganiro. Basabye kandi RDC n’u Rwanda kujya mu biganiro bigamije guhoshya aya makimbirane.

Leave a Reply

Your email address will not be published.