Spread the love

Abanyarwanda icyenda basabye ishami mpuzamahanga rishinzwe ibyaha mu Rukiko Rukuru rwa Uganda gutesha agaciro ibyaha by’iterabwoba bashinjwa. Batawe muri yombi mu Kuboza 2017 bakurikiranyweho iterabwoba, gukoresha inyandiko mpimbano, no gushinga ikigo cy’iterabwoba bafatanyije n’abandi 36.

Aba bakekwa ni Emmanuel Mugisha alias Byekwaso alias Mukisa, Pasiteri Musonyu Geoffrey alias Papa Sheema Elisaha, Daniel Kamara, Moses Bijura, Timothy Mukisa, Tuyisenge Janvier alias Mambo Ali, Olive Byakatonda alias Ojambo Kenneth, Bosco Maniriho alias Boyi alias Kigwe Robert, na Innocent Ndayisenga alias Gashube.

Ubushinjacyaha bukomeza buvuga ko abakekwa bagiye hanze ya Uganda bagamije gukora, gutegura, cyangwa kwitegura kugira uruhare mu bikorwa by’iterabwoba nko gutanga cyangwa guhabwa amahugurwa y’iterabwoba ku nyungu za politiki, idini, imibereho, ndetse n’ubukungu batitaye ku mutekano w’abandi cyangwa imitungo.

Ikirego kandi kivuga ko bamwe mu baregwa ndetse n’abandi batarafatwa, ahantu hatandukanye, bahimbye inyandiko cyangwa ibyemezo by’indangamuntu bibemerera kwinjira muri Uganda nk’abenegihugu ba Uganda nyamara barabikoze bagamije kubeshya cyangwa kuriganya.

Kuri uyu wa Kabiri, itariki 26 Nyakanga nk’uko tubikesha Ugandaradionetwork (URN) abanyamategeko bunganira abaregwa basabye Urukiko ruyobowe na Madamu Elizabeth Kabanda kureka ibirego baregwa ku mpamvu z’uko Leta ititeguye kubaburanisha nyamara bamaze imyaka 5 bafunzwe by’agateganyo.

Urukiko rwumvise ko batandatu mu bakekwa babanje gufungirwa kuri sitasiyo ya Polisi ya Mbarara, mu kigo cya Nalufenya, muri gereza ya Mbarara, ubu bakaba bari muri Gereza ya Luzira irinzwe bikomeye. Urukiko rwumvise kandi ko abandi bantu batatu bakekwaho icyaha barekuwe by’agateganyo mu 2019 n’urukiko rwisumbuye rwa Mbarara maze rubategeka kujya bitaba ishami rishinzwe ibyaha mpuzamahanga, ICD.

Innocent Okong, umwe mu banyamategeko avuga ko nta kimenyetso cyerekana ko Leta izakomeza urubanza.

Abanyamategeko barimo Okong, Geoffrey Turyamusiima, na Job Komakech bongeyeho ko ubushize bari mu Rukiko, abashinjacyaha bavuze ko amadosiye arimo ibirego by’abakekwaho icyaha yatakaye maze basaba guhabwa igihe cyo kugisha inama Umuyobozi w’Ubushinjacyaha- DPP ku bijyanye no gukuraho ibyaha baregwa cyangwa kubigumishaho.

Umuyobozi wungirije ushinzwe ubushinjacyaha, Thomas Jatiko, yamenyesheje urukiko ko bafite inyandiko z’amadosiye ndetse n’ibimenyetso byose bishinja abaregwa. Jatiko yasabye Urukiko kubaha ukwezi kumwe kugira ngo bashyikirize ibimenyetso byose itsinda ryunganira abaregwa ndetse batange n’icyemezo gisubiza icyifuzo gisaba gukuraho ibirego.

Umucamanza Kabanda yemeye icyifuzo cya Leta maze yimurira urubanza ku ya 24 Kanama kugira ngo ruzakomeze gusuzuma ikijyanye no gutesha agaciro. Abakekwa hagati aho bakomeje gufungwa by’agateganyo.

Ibimenyetso bya mbere byagejejwe imbere y’urukiko byerekana ko igihe batabwaga muri yombi muri 2017, abakekwa bari bafite hagati y’imyaka 16 na 26.

Leave a Reply

Your email address will not be published.