Spread the love

Abayobozi b’ibihugu by’umuryango w’akarere ka Afurika y’iburasirazuba (EAC) kuri uyu wa 20 Kamena 2022 barongera bahuriye mu nama i Nairobi muri Kenya.

Ikinyamakuru Standard cyo muri Kenya, gisobanura ko iyi nama yateguwe na Perezida Uhuru Kenyatta usanzwe ari Umuyobozi Mukuru wa EAC, iraba yiga ku mutekano muke uri mu burasirazuba bwa Repubulika ya Demukarasi ya Congo (RDC).

Nyuma yo kwiga kuri iki kibazo, byitezwe ko barafata icyemezo kidasubirwaho cyo kohereza umutwe w’ingabo uhuriweho mu burasirazuba bwa RDC kugira ngo urwanye imitwe yitwaje intwaro ikiriyo.

Iyi nama irakurikira iyahurije abasirikare bakuru b’ibi bihugu i Nairobi kuri uyu wa 19 Kamena 2022, bari mu myiteguro ya nyuma yo kohereza uyu mutwe w’ingabo.

Perezida wa Repubulika y’u Rwanda, Paul Kagame, ntazitabira iyi nama kubera ko azakira abazitabira inama y’abakuru b’ibihugu na za guverinoma ya Commonwealth izwi nka CHOGM, iratangira ejo.

Ntibizwi niba hari abandi bakuru b’ibihugu batazitabira iyi nama y’i Nairobi igiye kuba mu gihe umutwe witwaje intwaro wa M23 ukomeje gufata uduce dutandukanye muri teritwari ya Rutshuru no mu gihe u Rwanda na RDC bitabanye neza.

Leave a Reply

Your email address will not be published.